தமிழகத்தின் பெரும்பாலான பகுதிகளில் கடந்த சில வாரங்களாக வெயிலின் தாக்கம் மிகக் கடுமையாக இருந்து வருகிறது. கத்திரி வெயில் மற்றும் கோடை வெப்பத்தின் காரணமாகப் பொதுமக்கள், வாகன ஓட்டிகள் எனப் பலரும் கடும் அவதிக்குள்ளாகி வரும் சூழலில், வளிமண்டல மேலடுக்கு சுழற்சி மற்றும் வெப்பச் சலனம் காரணமாக அவ்வப்போது ஒரு சில பகுதிகளில் மழையும் பெய்து வருகிறது.

இந்த நிலையில், வெப்பத்தின் பிடியில் தவித்து வரும் மக்களுக்குக் குளிர்ச்சியூட்டும் விதமாக, இன்று தமிழகத்தின் சில மாவட்டங்களில் பலத்த கனமழை பெய்வதற்கான வாய்ப்புகள் அதிகம் இருப்பதாகச் சென்னை வானிலை ஆய்வு மையம் முக்கிய அறிவிப்பை வெளியிட்டுள்ளது.

சென்னை வானிலை ஆய்வு மையம் வெளியிட்டுள்ள அதிகாரப்பூர்வ எச்சரிக்கையின்படி, இன்று மேற்குத் தொடர்ச்சி மலைப் பகுதிகள் மற்றும் அதனை ஒட்டியுள்ள மாவட்டங்களில் பலத்த மழை பெய்யக்கூடும். குறிப்பாக, கோடைக்கால சுற்றுலாத் தலங்களான நீலகிரி மற்றும் கோயம்புத்தூர் ஆகிய மாவட்டங்களில் இன்று கனமழைக்கு வாய்ப்பு இருப்பதாகக் கணிக்கப்பட்டுள்ளது.

இதுமட்டுமன்றி, தென் மாவட்டங்களின் முக்கியப் பகுதிகளான தேனி மற்றும் திண்டுக்கல் ஆகிய மலைச் சார்ந்த மாவட்டங்களிலும், சர்வதேச சுற்றுலாத் தலமான கன்னியாகுமரி மாவட்டத்திலும் இன்று இடி மின்னலுடன் கூடிய பலத்த மழை பெய்யக்கூடும் என வானிலை ஆய்வாளர்கள் தெரிவித்துள்ளனர்.

மலைப் பிரதேசங்கள் மட்டுமன்றி, தமிழகத்தின் உள் மாவட்டங்கள் மற்றும் வட தமிழகத்தின் ஒரு சில பகுதிகளிலும் இன்று மழைக்கான சாதகமான சூழல் நிலவுகிறது. அந்த வகையில் கிருஷ்ணகிரி மற்றும் தர்மபுரி ஆகிய மாவட்டங்களில் இன்று பரவலாகக் கனமழை பெய்ய வாய்ப்புள்ளது.

இதேபோல், சமீபகாலமாக அதிகப்படியான வெப்பம் பதிவாகி வந்த சேலம், நாமக்கல், கரூர் மற்றும் மதுரை ஆகிய மாவட்டங்களிலும் இன்று இடி முழக்கத்துடன் கூடிய கனமழை பெய்யும் என வானிலை ஆய்வு மையம் தனது அண்மைச் செய்தியில் குறிப்பிட்டுள்ளது.

இந்த நிலையில், கடும் வெயிலுக்கு மத்தியில் இன்று பிற்பகல் சுமார் 3 மணிக்கு மேல் தூத்துக்குடியில் இடியுடன் கூடிய திடீரெனக் மழை பெய்ததால் மண்ணும் குளிர்ந்தது, வெயிலால் வாடி வதங்கி வந்த மக்களின் தேகங்களும் குளிர்ந்தது.

மேலும், மழை பெய்யும் சமயங்களில் இடி மற்றும் மின்னலின் தாக்கம் அதிகமாக இருக்க வாய்ப்புள்ளதால், மரங்களின் அடியிலோ அல்லது மின் கம்பங்களுக்கு அருகிலோ பொதுமக்கள் நிற்க வேண்டாம் என உள்ளாட்சி நிர்வாகங்களும் எச்சரித்துள்ளன. இந்தத் திடீர் மழை, வெயிலின் தாக்கத்தைக் குறைத்து நிலத்தடி நீர்மட்டத்தை உயர்த்த உதவும் என்பதால் விவசாயிகளும், பொதுமக்களும் மகிழ்ச்சியடைந்துள்ளனர்.