தமிழக சட்டமன்றத் தேர்தல் நெருங்கி வரும் சூழலில், அரசியல் களம் முன்னெப்போதும் இல்லாத வகையில் பரபரப்படைந்துள்ளது. ஆட்சியைத் தக்கவைக்க திமுக கூட்டணியும், இழந்த ஆட்சியைப் பிடிக்க அதிமுக - பாஜக தரப்பும் தீவிரமாகச் செயல்பட்டு வருகின்றன. இவர்களுடன் நாம் தமிழர் மற்றும் தமிழக வெற்றிக் கழகம் ஆகிய கட்சிகளும் களம் காண்பதால், இம்முறை தமிழகத்தில் நான்கு முனைப் போட்டி  உறுதியாகியுள்ளது.

மிகவும் வலுவான கூட்டணியாகப் பார்க்கப்படும் திமுக கூட்டணியில், காங்கிரஸ் கட்சி எழுப்பியுள்ள கூட்டணி ஆட்சி கோரிக்கை பெரும் விவாதத்தை ஏற்படுத்தியுள்ளது. குறிப்பாக, காங்கிரஸ் முக்கிய நிர்வாகிகளான பிரவீன் சக்கரவர்த்தி மற்றும் மாணிக்கம் தாகூர் ஆகியோர், ஆட்சி அதிகாரத்தில் பங்கு வேண்டும் என்பதைத் தொடர்ந்து வலியுறுத்தி வருகின்றனர்.

இது தொடர்பாக முதலமைச்சர் ஸ்டாலின் ஏற்கனவே விளக்கம் அளிக்கையில், தமிழக அரசியல் சூழலுக்கு கூட்டணி ஆட்சி செட் ஆகாது என்று திட்டவட்டமாகக் கூறியிருந்தார். இது காங்கிரஸ் தரப்பில் அதிர்ச்சியை ஏற்படுத்தினாலும், அக்கட்சியின் இரண்டாம் கட்டத் தலைவர்கள் தொடர்ந்து அதே கோரிக்கையை முன்வைத்து வருகின்றனர்.

இந்த விவகாரம் குறித்து செய்தியாளர்களிடம் பேசிய திமுக அமைப்புச் செயலாளர் ஆர்.எஸ். பாரதி, காங்கிரஸின் கோரிக்கையைத் துணிச்சலாக எதிர்கொண்டார். மல்லிகார்ஜுன கார்கே, ராகுல் காந்தி மற்றும் செல்வப்பெருந்தகை ஆகிய மூவர் மட்டுமே காங்கிரஸின் அதிகாரப்பூர்வப் பிரதிநிதிகள். அவர்கள் கேள்வி எழுப்பினால் மட்டுமே திமுக பதில் சொல்ல வேண்டிய அவசியம் உள்ளது.

தமிழகத்தில் கூட்டணி ஆட்சி சாத்தியமில்லை என்பதை ராகுல் காந்தியே புரிந்துகொண்டு ஏற்றுக்கொள்வார். திமுக தலைவர் தனது முடிவை மிகத் தெளிவாகத் தெரிவித்துவிட்டார். இனி யாரும் ஆட்சியில் பங்கு கோரி பேசமாட்டார்கள். இந்த விவகாரத்தால் கூட்டணி பேச்சுவார்த்தையிலோ அல்லது தொகுதிப் பங்கீட்டிலோ எந்தவித பாதிப்பும் ஏற்படாது.

ரூ. 5,000 போன்ற மக்கள் நலத் திட்டங்கள் அறிவிக்கப்பட்டுள்ள நிலையில், மக்களின் மனநிலை திமுகவிற்கு சாதகமாக இருப்பதாக அக்கட்சி நம்புகிறது. அதேவேளையில், தொகுதிப் பங்கீடு மற்றும் தேர்தல் வாக்குறுதிகள் தொடர்பாக அனைத்துக் கட்சிகளும் தங்கள் வியூகங்களை இறுதி செய்து வருகின்றன.