மத்திய கிழக்கு பிராந்தியத்தில் ஈரான் மற்றும் இஸ்ரேல்-அமெரிக்கா இடையிலான மோதல் புதிய உச்சத்தை எட்டியுள்ளது. ஈரானின் உயர்மட்டத் தலைவர் கொல்லப்பட்டதற்குப் பழிவாங்கும் நடவடிக்கையாக, அந்தப் பிராந்தியத்தில் உள்ள அமெரிக்கத் தளங்களைக் குறிவைத்து ஈரான் தொடர் தாக்குதல்களை முன்னெடுத்து வருகிறது. இந்தச் சூழலில், குவைத் வான்பரப்பில் பறந்து கொண்டிருந்த அதிநவீன F-15 போர் விமானம் ஒன்று தீப்பிழம்புகளுடன் கீழே விழுந்து நொறுங்கிய வீடியோ இணையத்தில் வெளியாகி பெரும் அதிர்வலைகளை ஏற்படுத்தியுள்ளது.

குவைத்தில் உள்ள அமெரிக்காவின் அலி அல் சலெம் விமானப்படைத் தளத்திற்கு அருகே, சுமார் 10 கிலோமீட்டர் தொலைவில் இந்தச் சம்பவம் நிகழ்ந்துள்ளது. வானில் சுழன்று விழுந்த அந்த விமானத்தில் இருந்த இரண்டு விமானிகளும் பாராசூட் மூலம் பாதுகாப்பாக வெளியேறியதாகத் தகவல்கள் தெரிவிக்கின்றன.

இந்த அமெரிக்கப் போர் விமானத்தை தாங்களே சுட்டு வீழ்த்தியதாக ஈரான் உரிமை கொண்டாடியுள்ளது. மற்றொரு தரப்போ, இது தவறுதலாகத் தங்கள் நாட்டுப் படைகளாலேயே சுடப்பட்டிருக்கலாம் எனக் கூறுகிறது. விழுந்த விமானம் F-15E ரகமா அல்லது குவைத் விமானப்படை பயன்படுத்தும் F/A-18 ரகமா என்பதில் இன்னும் அதிகாரப்பூர்வத் தெளிவு இல்லை.

விமான விபத்தைத் தொடர்ந்து, குவைத்தில் உள்ள அமெரிக்கத் தூதரகப் பகுதியிலிருந்து கரும்புகை வெளியேறியதாகச் செய்திகள் வெளியாகின. தூதரகம் தாக்கப்பட்டதா என்பது குறித்து அமெரிக்கா அல்லது குவைத் அரசு இதுவரை நேரடித் தகவல்களை வெளியிடவில்லை. இருப்பினும், முன்னெச்சரிக்கை நடவடிக்கையாகத் தூதரகப் பணியாளர்கள் வெளியேற்றப்பட்டுள்ளனர். அங்குள்ள அமெரிக்கக் குடிமக்கள் வீடுகளை விட்டு வெளியே வர வேண்டாம் என்றும், பாதுகாப்பான இடங்களுக்குச் செல்லுமாறும் தூதரகம் அவசர எச்சரிக்கை விடுத்துள்ளது.

தற்போது வரை இந்த மோதல் ஈரான், இஸ்ரேல் மற்றும் அமெரிக்கா ஆகிய நாடுகளுக்கு இடையே மட்டுமே நேரடியாக நீடிக்கிறது. ஆனால், குவைத் போன்ற பிற மத்திய கிழக்கு நாடுகளும் இதில் பாதிக்கப்படுவது உலக நாடுகளை அச்சத்தில் ஆழ்த்தியுள்ளது.

இந்த போர்ச் சூழல் ஒட்டுமொத்தப் பிராந்தியத்தையும் சீர்குலைக்கும் என்பதால், இந்தியா உள்ளிட்ட பல நாடுகள் உடனடியாகப் போரை நிறுத்திவிட்டு, பேச்சுவார்த்தை மூலம் தீர்வுகாண வலியுறுத்தி வருகின்றன.