தூத்துக்குடி மாவட்டம் தட்டார்மடம் காவல் நிலைய எல்லைக்குட்பட்ட முதலூர் பகுதியில் ஏற்பட்ட குடும்பப் பிரச்சினை வன்முறையாக மாறியதில், பெண் ஒருவர் வெட்டிக் கொலை செய்யப்பட்டார். மேலும், அவரது கணவர் மற்றும் மகன் அரிவாளால் தாக்கப்பட்டு காயமடைந்தனர். இச்சம்பவத்திற்குப் பிறகு அழைத்துச் செல்லப்பட்ட இரண்டு சிறுமிகளையும் காவல்துறையினர் பத்திரமாக மீட்டுள்ளனர்.

முதலூர் பகுதியைச் சேர்ந்த முத்துக்கிருஷ்ணன் (43) என்பவரது குடும்பத்தினருக்கும், சாத்தான்குளம் ஆனந்தபுரத்தைச் சேர்ந்த ஞானபிரகாஷ் என்பவருக்கும் இடையே, முத்துக்கிருஷ்ணனின் 15 வயது மகளுடன் தொடர்புடைய காதல் விவகாரம் காரணமாக முன்விரோதம் இருந்து வந்ததாகக் கூறப்படுகிறது. இதன் காரணமாக இரு தரப்பினருக்கும் இடையே அடிக்கடி தகராறு ஏற்பட்டு வந்ததாகத் தெரிகிறது.

இந்த நிலையில், அக்டோபர் 22-ஆம் தேதி இரவு முத்துக்கிருஷ்ணனின் வீட்டிற்குச் சென்ற ஞானபிரகாஷ், அங்கிருந்தவர்களுடன் மீண்டும் தகராறில் ஈடுபட்டதாகக் கூறப்படுகிறது. அப்போது முத்துக்கிருஷ்ணன், அவரது மனைவி மேரி விஜிலா (39) மற்றும் அவர்களது 12 வயது மகன் ஆகியோரை அரிவாளால் தாக்கியதாகக் கூறப்படுகிறது.

இந்தத் தாக்குதலில் மேரி விஜிலா சம்பவ இடத்திலேயே உயிரிழந்தார். படுகாயமடைந்த முத்துக்கிருஷ்ணன் மற்றும் அவரது மகன் மருத்துவ உதவிக்காக மருத்துவமனைக்கு அனுப்பி வைக்கப்பட்டனர்.

சம்பவம் குறித்த தகவல் கிடைத்ததும் தட்டார்மடம் காவல்துறையினர் விரைந்து சென்று மீட்புப் பணியில் ஈடுபட்டனர். உயிரிழந்த மேரி விஜிலாவின் உடலைக் கைப்பற்றிய போலீசார், உடற்கூராய்வுக்காக திருநெல்வேலி அரசு மருத்துவக் கல்லூரி மருத்துவமனைக்கு அனுப்பி வைத்தனர்.

இதற்கிடையில், சம்பவத்தின்போது வீட்டிலிருந்த இரண்டு சிறுமிகளையும் ஞானபிரகாஷ் தன்னுடன் அழைத்துச் சென்று தனது வீட்டில் வைத்திருந்ததாக முதற்கட்ட விசாரணையில் தெரியவந்தது. இதையடுத்து அங்கு சென்ற காவல்துறையினர் இரண்டு சிறுமிகளையும் பத்திரமாக மீட்டனர்.

பெண் கொலை செய்யப்பட்ட சம்பவம் தொடர்பாக வழக்குப் பதிவு செய்து  காவல்துறையினர் விசாரணை மேற்கொண்டு வருகின்றனர். குடும்பப் பிரச்சினை தொடர்பாக ஏற்பட்டதாகக் கூறப்படும் இந்தச் சம்பவம் முதலூர் பகுதியில் அதிர்ச்சியை ஏற்படுத்தியுள்ளது.