தமிழகத்தில் 2026 சட்டமன்றத் தேர்தல் நெருங்கி வருவதை முன்னிட்டு, தூத்துக்குடி மாவட்ட எல்லைப் பகுதிகளில் பாதுகாப்புப் பணிகள் முடுக்கிவிடப்பட்டுள்ளன. மாவட்ட காவல் கண்காணிப்பாளர் சி. மதன் அவர்கள், எல்லைகளில் அமைக்கப்பட்டுள்ள சோதனைச் சாவடிகளுக்கு நேரில் சென்று பாதுகாப்பு ஏற்பாடுகளை ஆய்வு செய்தார். 

மாவட்ட எல்லைகளில் உள்ள அனைத்து சோதனைச் சாவடிகளிலும் போலீசார் சுழற்சி முறையில் 24 மணி நேரமும் பணியில் ஈடுபட்டுள்ளனர். சோதனைக்கு உட்படுத்தப்படும் ஒவ்வொரு வாகனத்தின் விவரங்களும் முறையாகப் பதிவேடுகளில் குறிக்கப்பட்டு வருகின்றன. மாவட்டத்திற்குள் நுழையும் மற்றும் வெளியேறும் வாகனங்களை உன்னிப்பாகக் கண்காணிக்க அதிநவீன சிசிடிவி கேமராக்கள் பயன்படுத்தப்படுகின்றன.

இதனையடுத்து, நேற்று செய்துங்கநல்லூர் பகுதியில் உள்ள சோதனைச் சாவடிக்கு எஸ்பி சி. மதன் திடீர் வருகை தந்து, அங்கு நடைபெற்று வரும் பணிகளைப் பார்வையிட்டார். அப்போது பணியில் இருந்த காவலர்களிடம், சோதனையின் போது பின்பற்ற வேண்டிய வழிமுறைகள் குறித்தும், கூடுதல் விழிப்புணர்வுடன் செயல்படுவது குறித்தும் அறிவுரைகளை வழங்கினார்.

இந்த ஆய்வின் போது ஸ்ரீவைகுண்டம் டிஎஸ்பி நிரேஷ், செய்துங்கநல்லூர் இன்ஸ்பெக்டர் ஜுன்குமார் மற்றும் காவல்துறையினர் உடனிருந்தனர். தேர்தல் முடியும் வரை இந்த தீவிரக் கண்காணிப்பு தொடரும் எனத் தெரிவிக்கப்பட்டுள்ளது.