தூத்துக்குடி - மதுரை புதிய துறைமுகம் பை பாஸ் ரோட்டில் இருசக்கர வாகனம் மீது பின்னால் வந்த டிப்பர் லாரி மோதிய விபத்தில் லாரி ஷெட் உரிமையாளர் பரிதாபமாக உயிரிழந்தார்.
தூத்துக்குடி ஆவுடையார்புரத்தைச் சேர்ந்த கந்தசாமி மகன் சுப்பையா (70). இவர் தூத்துக்குடி - மதுரை புதிய துறைமுகம் பை பாஸ் ரோட்டில் லாரி ஷெட் நடத்தி வருகிறார். இந்திலையில் நேற்று ( நவம்பர் 21) மதியம் தனது லாரி ஷெட்டிலிருந்து வீட்டிற்குச் செல்வதற்காக இருசக்கர வாகனத்தில் புறப்பட்டுச் சென்று கொண்டிருந்தார்.
அப்பொழுது தூத்துக்குடி புதிய துறைமுகம் - மதுரை பைபாஸ் சாலையில் மடத்தூர் அருகே உள்ள தனியார் கேஸ் கம்பெனி அருகே அவர் சென்ற போது, பின்னால் வேகமாக வந்த டிப்பர் லாரி எதிர்பாராத விதமாக அவரது இருசக்கர வாகனத்தின் மீது மோதியது. இதில் சாலையில் தூக்கி வீசப்பட்டுப் பலத்த காயமடைந்த சுப்பையா, சம்பவ இடத்திலேயே பரிதாபமாக உயிரிழந்தார்.
விபத்து குறித்துத் தகவலறிந்த சிப்காட் காவல் நிலைய போலீசார் சம்பவ இடத்திற்கு விரைந்து சென்று உயிரிழந்த சுப்பையாவின் உடலைக் கைப்பற்றிய போலீசார், பிரேதப் பரிசோதனைக்காகத் தூத்துக்குடி அரசு மருத்துவமனைக்கு அனுப்பி வைத்தனர்.
மேலும், இச்சம்பவம் குறித்து வழக்குப் பதிவு செய்த போலீசார், விபத்தை ஏற்படுத்திய டிப்பர் லாரியை ஓட்டி வந்த திருநெல்வேலி மாவட்டம் தச்சநல்லூரைச் சேர்ந்த பழனிவேல் (24) என்பவரைக் கைது செய்து விசாரணை மேற்கொண்டு வருகின்றனர்.