தூத்துக்குடி அருகே உள்ள தருவைகுளம் கிராமம், பண்டைய வரைபடங்களில் 'கீழ்பட்டினம்' என்று அழைக்கப்பட்டதற்கான வரலாற்றுச் சான்றுகளைத் தூத்துக்குடியைச் சேர்ந்த தொல்லியல் ஆர்வலர் இராஜேஷ் செல்வரதி விளக்கியுள்ளார்.
ஐரோப்பிய வரைபடங்களில் கீழ்பட்டினம்18-ஆம் நூற்றாண்டின் தொடக்கத்தில் (1710-1740), உலகப் புகழ்பெற்ற வரைபடவியலாளர்களான வான் கியூலன், ஜீன்-பாப்டிஸ்ட் டி'அன்வில்லே மற்றும் குய்லூம் டி'எல்'ஐல் ஆகியோர் தயாரித்த வரைபடங்களில், இப்பகுதி 'கீழ்பட்டினம்' என்றே குறிக்கப்பட்டுள்ளது. தூத்துக்குடிக்கும் பட்டினமருதூருக்கும் இடைப்பட்ட இந்த இடம், அக்காலத்தில் முத்துச் சலசலப்பு மற்றும் கடல் வழிசெலுத்தலுக்கு மிக முக்கியமான இடமாக விளங்கியுள்ளது.
1775-க்குப் பிறகு, டச்சுக்காரர்களின் ஆதிக்கம் குறைந்து ஆங்கிலேயர்களின் வருகை அதிகரித்தபோது இப்பெயரில் மாற்றம் ஏற்பட்டது. ராபர்ட் ஓர்ம் மற்றும் ஜேம்ஸ் ரென்னல் போன்ற பிரிட்டிஷ் வரைபடவியலாளர்கள், கடல்சார் பெயரான 'கீழ்பட்டினம்' என்பதற்குப் பதிலாக, உள்ளூர் மக்கள் பயன்படுத்திய 'தரவர்குளம்' என்ற பெயரைப் பயன்படுத்தத் தொடங்கினர்.
டச்சுக்காரர்கள் முத்து வணிகத்தை மையமாகக் கொண்டு 'கீழ்பட்டினம்' என்ற பெயரையே பயன்படுத்தினர். ஆனால், ஆங்கிலேயர்கள் நில வருவாய் மற்றும் ராணுவ நடவடிக்கைகளுக்காக, மக்கள் வழக்கத்தில் இருந்த 'தருவைகுளம்' என்ற பெயரையே பதிவேடுகளில் ஏற்றினர். இந்திய புவியியலின் தந்தை என அழைக்கப்படும் ஜேம்ஸ் ரென்னல், 1794-இல் பழைய வரைபடப் பிழைகளைச் சரிசெய்து, 'தருவைகுளம்' என்ற பெயரை உறுதிப்படுத்தினார்.
இது குறித்து இராஜேஷ் செல்வரதி கூறுகையில், ஆங்கிலேயர் ஆட்சிக்காலத்தில் ஸ்டீபன் லுஷிங்டன் மற்றும் கர்னல் அலெக்சாண்டர் ரீட் போன்ற அதிகாரிகள் நடத்திய நில அளவையின் போது இப்பெயர் மாற்றம் முழுமை பெற்றது. 19-ஆம் நூற்றாண்டில் பிஷப் கால்டுவெல் காலத்தில் இது அதிகாரப்பூர்வ வருவாய் கிராமமாக மாறியது எனத் தெரிவித்துள்ளார். கி.பி. 1292-இல் புகழ்பெற்ற பயணி மார்க்கோ போலோ குறிப்பிட்ட செல்வச் செழிப்பு மிக்க வணிக நகரத்தின் எச்சங்கள், பட்டினமருதூர் மற்றும் தருவைகுளம் இடைப்பட்ட பகுதியில் மறைந்து கிடக்கின்றன.
இப்பகுதியில் சமீபத்தில் 300 ஏக்கர் நிலம் அகழ்வாராய்ச்சிக்கு அங்கீகரிக்கப்பட்டுள்ளது.இந்த வரலாற்றுச் சிறப்புமிக்க இடத்தினை முறையாக அகழ்வாய்வு செய்து, தமிழர்களின் பண்டைய கடல்சார் வரலாற்றை உலகிற்கு மீண்டும் அடையாளப்படுத்த வேண்டும் என்பதே வரலாற்று ஆர்வலர்களின் எதிர்பார்ப்பாக உள்ளது.
