கேரள மாநிலம் வயநாடு மாவட்டம் கல்லடி பகுதியில் ஏற்பட்டுள்ள பயங்கர நிலச்சரிவு நாடு முழுவதும் பெரும் பரபரப்பை ஏற்படுத்தியுள்ளது.

இந்த விபத்தில் சிக்கி இதுவரை 5 பேர் உயிரிழந்துள்ள நிலையில், மீட்புப் பணிகள் தொடர்ந்து தீவிரமாக நடைபெற்று வருகின்றன. இந்த துயர சம்பவத்திற்கு அங்கு நடைபெற்று வரும் கல்லடி - மேப்பாடி சுரங்கப் பாதை திட்டமே முக்கிய காரணம் என்ற குற்றச்சாட்டு எழுந்துள்ள சூழலில், இத்திட்டத்திற்கு அனுமதி அளித்த நிபுணர் குழுவின் முன்கூட்டிய எச்சரிக்கை அறிக்கைகள் இப்போது வெளியாகி அதிர்ச்சியை ஏற்படுத்தியுள்ளன.

முன்கூட்டியே எச்சரித்த வல்லுநர் குழு

வயநாட்டின் கல்லடி மற்றும் கோழிக்கோட்டின் மேப்பாடி ஆகிய பகுதிகளை இணைக்கும் வகையில் 8.753 கிலோமீட்டர் நீளமுள்ள சுரங்கச் சாலைத் திட்டப் பணிகள் கடந்த சில மாதங்களாக நடைபெற்று வந்தன. சுமார் 2,043.74 கோடி ரூபாய் மதிப்பீட்டில் திட்டமிடப்பட்ட இந்த சுரங்கப் பாதைக்கு, கடந்த 2025 மார்ச் 2ஆம் தேதியன்று மாநில சுற்றுச்சூழல் நிபுணர் மதிப்பீட்டுக் குழு (SEAC) சுற்றுச்சூழல் அனுமதி வழங்கியிருந்தது.

அனுமதி வழங்கப்பட்ட போதிலும், இந்தத் திட்டம் அமையவுள்ள பகுதி புவியியல் ரீதியாக மிகவும் பலவீனமானது என்றும், இங்கு கடுமையான நிலச்சரிவு ஏற்படுவதற்கான பேராபத்து இருப்பதாகவும் SEAC தனது அறிக்கையில் மிகத் தெளிவாகக் குறிப்பிட்டிருந்தது.

முந்தைய பேரிடர்களின் சான்றுகள்

சுரங்கம் அமையவிருக்கும் பகுதியானது, ஏற்கனவே கடந்த 2019ஆம் ஆண்டு புதுமலையிலும், 2024ஆம் ஆண்டு முண்டக்கை - சூரல்மலையிலும் பேரழிவை ஏற்படுத்திய நிலச்சரிவுப் பகுதிகளுக்கு மிக அருகாமையில் உள்ளது. இதனால் இப்பகுதியில் எந்தவொரு கட்டுமானப் பணியை மேற்கொண்டாலும் கூடுதல் எச்சரிக்கை அவசியம் என வல்லுநர்கள் அறிவுறுத்தியிருந்தனர்.

அச்சுறுத்தலுக்கு உள்ளாகும் சுற்றுச்சூழல் மற்றும் பழங்குடிகள்

இந்த சுரங்கச் சாலைத் திட்டத்தால் அப்பகுதியின் பல்லுயிர்பெருக்கமும், பூர்வகுடி மக்களின் வாழ்வாதாரமும் கடுமையாகப் பாதிக்கப்படும் அபாயம் உள்ளதாக சுற்றுச்சூழல் நிபுணர் குழு சுட்டிக்காட்டியிருந்தது.

சுற்றுச்சூழல் உணர்திறன் மண்டலம்: இத்திட்டம் அமையவுள்ள திருவம்பாடி மற்றும் வெள்ளரிமலை கிராமங்கள் 'சுற்றுச்சூழல் உணர்திறன் மிக்க பகுதிகள்' (Ecologically Sensitive Area) என வகைப்படுத்தப்பட்டுள்ளன.

வனப்பகுதி ஆக்கிரமிப்பு: சுரங்கப் பாதையின் மொத்த நீளத்தில் சுமார் 80 சதவீதம் (5.76 கி.மீ.) அடர்ந்த வனப்பகுதி வழியாகச் செல்கிறது. இதற்காக 17.263 ஹெக்டேர் வன நிலங்கள் பயன்படுத்தப்படவிருந்தன.

வனவிலங்கு பாதிப்பு: திட்டப் பகுதியை ஒட்டிய 10 கி.மீ. சுற்றளவில் நீலகிரி உயிர்க்கோளக் காப்பகம் அமைந்துள்ளது. இங்கு வாழும் அரிய வகை பறவைகள் மற்றும் வனவிலங்குகளின் வாழ்விடங்கள் இதனால் அழியும் அபாயம் இருந்தது.

பழங்குடியின மக்களின் வாழ்வாதாரம்: திட்டப் பகுதிக்கு அருகில் உள்ள நான்கு பழங்குடியினர் குடியிருப்புகளில், குறிப்பாக 27 குடும்பங்கள் வசிக்கும் 'அரணமலை கட்டுநாயக்கா காலனி' நேரடியாகப் பாதிக்கப்படும் என்பதால் அவர்களுக்கு முறையான மறுவாழ்வு மற்றும் இழப்பீடு வழங்க வலியுறுத்தப்பட்டது.

குறைபாடுகளுடன் கூடிய அறிக்கையும், நிதி ஒதுக்கீடும்

பொதுப்பணித்துறை முதலில் சமர்ப்பித்த அறிக்கையில் நிலச்சரிவு அபாயங்கள் குறித்தோ, வெடிவைப்பதன் மூலம் ஏற்படும் அதிர்வுகள் குறித்தோ முறையான விளக்கங்கள் இல்லை. இதையடுத்து 28 கூடுதல் ஆவணங்களையும், கடந்த கால நிலச்சரிவுகள் குறித்த விரிவான புவியியல் ஆய்வுகளையும் சமர்ப்பிக்குமாறு நிபுணர் குழு உத்தரவிட்டது. மேலும், இப்பகுதியில் இரண்டு சிறிய புவிப் பிளவு கோடுகள் (Fault Lines) இருப்பதையும் குழு கண்டறிந்தது.

சுற்றுச்சூழல் பாதிப்புகளைக் குறைப்பதற்கான தணிப்புத் தொகையாக முதலில் வெறும் 1.02 கோடி ரூபாய் மட்டுமே ஒதுக்கப்பட்டிருந்தது. இது மிகக் குறைவு என நிபுணர் குழு சுட்டிக்காட்டிய பின், அந்தத் தொகை 15 கோடி ரூபாயாக உயர்த்தப்பட்டது. இருப்பினும், யானைகள் வழித்தடத்தை மீட்டெடுப்பதற்கும், பழங்குடி மக்களின் மறுவாழ்விற்கும் இந்தத் தொகையும் போதுமானதல்ல என்றே கருதப்பட்டது.

விபத்துக்குக் காரணமான விதிமீறல்?

இறுதியாக பல்வேறு நிபந்தனைகளுடன் தான் இந்த சுரங்கப் பணிக்கு அனுமதி வழங்கப்பட்டது. சுற்றுச்சூழல் பாதிப்பைக் கட்டுப்படுத்த நிபுணர் குழு விதித்த 25 முக்கிய கட்டுப்பாடுகளில் முதன்மையானது: "கட்டுமானப் பணிகள் மூலம் வெளியாகும் மண் மற்றும் இதர கழிவுகளைச் சாலைகளிலோ அல்லது நடைபாதைகளிலோ எங்கும் கொட்டி வைக்கக் கூடாது" என்பதாகும்.

ஆனால், இந்த விதியை மீறி சுரங்கப் பாதைக்காகத் தோண்டப்பட்ட டன் கணக்கிலான மண், சுரங்கத்திற்கு அருகிலேயே கொட்டி வைக்கப்பட்டதாகக் கூறப்படுகிறது. தற்போது கேரளாவில் பெய்து வரும் கனமழையின் காரணமாக, அவ்வாறு விதிமுறைகளை மீறி குவிக்கப்பட்டிருந்த பிரம்மாண்ட மண் குவியலே சரிந்து விழுந்து இந்த கோர விபத்தை ஏற்படுத்தியுள்ளதாக முதற்கட்டத் தகவல்கள் தெரிவிக்கின்றன.

சுற்றுச்சூழல் விதிகளையும், நிபுணர்களின் எச்சரிக்கையையும் அலட்சியப்படுத்தியதே 5 உயிர்கள் பலியாகக் காரணம் என்ற குற்றச்சாட்டு இப்பகுதியில் பெரும் கொந்தளிப்பை ஏற்படுத்தியுள்ளது.