<p><b>வாக்குப்பதிவு சதவீதம் அதிகரித்ததைக் கொண்டு குறிப்பிட்ட கட்சிகள் வெற்றியை முன்கூட்டியே கொண்டாடுவது அரசியல் மாயை என்றும், அது மக்களை தவறாக வழிநடத்தும் பிரசாரம் என்றும் கே. ஜெகதீஷ்வர ரெட்டி கடும் எச்சரிக்கை விடுத்துள்ளார்.</b></p><p><br></p><p>சமீப தேர்தலுக்கு பிறகு சில தரப்புகள் உயர்ந்த வாக்குப்பதிவு சதவீதத்தை தங்களுக்கு சாதகமான அலை என சித்தரிப்பது உண்மையை மறைக்கும் முயற்சி என அவர் குறிப்பிட்டுள்ளார்.</p><p><br></p><p>அவரின் விளக்கப்படி, வாக்குப்பதிவு சதவீத உயர்வுக்கு மக்கள் மனநிலை மட்டும் காரணமல்ல; வாக்காளர் பட்டியல் திருத்தங்கள், இறந்தோர் பெயர் நீக்கம், இரட்டை பதிவுகள் அகற்றம், இடம்பெயர்ந்தோர் விவர மாற்றம், புதிய இளைஞர் வாக்காளர்கள் சேர்ப்பு போன்ற காரணிகளும் முக்கிய பங்கு வகிக்கின்றன.</p><p><br></p><p>வாக்காளர் எண்ணிக்கை குறைந்த பின் வாக்குப்பதிவு சதவீதம் உயர்ந்து தோன்றலாம்; அதனை அரசியல் அலை என காட்டுவது தவறான புரிதல்,என அவர் சுட்டிக்காட்டியுள்ளார்.</p><p><br></p><p>தமிழ்நாடு, மேற்கு வங்காளம், ஆந்திரப் பிரதேசம், தெலங்கானா உள்ளிட்ட மாநிலங்களில் நடந்த பட்டியல் மாற்றங்கள் இந்த முறை தேர்தல் சதவீத கணக்குகளில் தாக்கம் ஏற்படுத்தியுள்ளதாகவும் அவர் தெரிவித்துள்ளார்.</p><p><br></p><p>மேலும் வாக்குப்பதிவு சதவீதத்தை வைத்து வெற்றி தோல்வி குறித்து ஊகங்கள் பரப்புவது மட்டுமல்லாமல், அதனை நம்பி பந்தய கலாச்சாரம் உருவாகுவது ஆபத்தான போக்கு எனவும் எச்சரித்துள்ளார்.</p><p><br></p><p>உண்மையான தீர்ப்பு வாக்குப்பதிவு சதவீதத்தில் இல்லை; மக்களின் வாக்கு எண்ணிக்கையில்தான் இருக்கிறது. இறுதி முடிவை மக்கள் வாக்கே தீர்மானிக்கும், என்று ஜெகதீஷ்வர ரெட்டி தெரிவித்துள்ளார்.</p><p><br></p><p>தவறான அரசியல் கணிப்புகள் மற்றும் மாயப் பிரசாரங்களை நம்பாமல், அதிகாரப்பூர்வ தேர்தல் முடிவுகளுக்காக காத்திருக்க வேண்டும் என்றும் அவர் மக்களிடம் கேட்டுக்கொண்டுள்ளார்.</p>