<p><b>இந்தியாவின் முன்னணி துறைமுகங்களில் ஒன்றான தூத்துக்குடி வ.உ.சிதம்பரனார் துறைமுக ஆணையம், தொழில்நுட்பப் புரட்சியில் இறங்கியுள்ளது.</b></p><p><br></p><p>இந்தியாவிலேயே முதல் முறையாக 'டிஜிட்டல் ட்வின்' (Digital Twin) எனப்படும் அதிநவீன மெய்நிகர் தொழில்நுட்பத்தை அறிமுகப்படுத்தி, ஒட்டுமொத்த தேசத்தின் கவனத்தையும் ஈர்த்துள்ளது.</p><p><br></p><p>மத்திய துறைமுகங்கள் மற்றும் கப்பல் போக்குவரத்துத் துறை அமைச்சர் சர்பானந்த சோனாவால் தொடங்கி வைத்த இந்தத் திட்டம், இந்தியத் துறைமுகங்களை உலகத் தரத்திற்கு உயர்த்தும் ஒரு முக்கிய நகர்வாகப் பார்க்கப்படுகிறது.</p><p><br></p><p><b>என்ன இந்த 'டிஜிட்டல் ட்வின்' தொழில்நுட்பம்?</b></p><p><br></p><p>சுருக்கமாகச் சொன்னால், துறைமுகத்தின் மொத்த உள்கட்டமைப்பு மற்றும் செயல்பாடுகளை அப்படியே கணினியில் ஒரு மெய்நிகர் மாதிரியாக (Virtual Copy) உருவாக்குவதே இந்தத் தொழில்நுட்பம்.</p><p><br></p><p><b>தரவு சேகரிப்பு:</b> இதற்காக ஐஓடி (IoT) சென்சார்கள், ஜிபிஎஸ், லிடார் (LiDAR) மேப்பிங் மற்றும் ட்ரோன் கேமராக்கள் பயன்படுத்தப்படுகின்றன.</p><p><br></p><p><b>நேரடி கண்காணிப்பு: </b>துறைமுகத்தில் தற்போது என்ன நடந்து கொண்டிருக்கிறது என்பதைத் திரையில் தத்ரூபமாகப் பார்க்க முடியும்.</p><p><br></p><p><b>முன்கூட்டியே திட்டமிடல்:</b> 'என்ன நடக்கும்' (What-if simulation) என்ற அடிப்படையில், எதிர்கால நெரிசல்கள் அல்லது சவால்களை முன்கூட்டியே கணித்து அதற்கேற்ப முடிவெடுக்க இந்தத் தளம் உதவுகிறது.</p><p><br></p><p><b>ஏற்படப்போகும் அதிரடி மாற்றங்கள்:</b></p><p>இந்தத் தொழில்நுட்பம் வெறும் காட்சித் திரையோடு நின்றுவிடாமல், துறைமுகத்தின் செயல்திறனைப் பல மடங்கு உயர்த்தப்போகிறது</p><p><br></p><p><b>நேர சேமிப்பு: </b>கப்பல்கள் துறைமுகத்திற்கு வந்து செல்லும் நேரம் (Vessel Turnaround Time) சுமார் 25% வரை குறையும்.</p><p><br></p><p><b>துல்லியமான கணிப்பு</b>: இயந்திரக் கோளாறுகள் அல்லது போக்குவரத்து நெரிசல்களைத் தரவுகளின் அடிப்படையில் முன்கூட்டியே கண்டறியலாம்.</p><p><br></p><p><b>சுற்றுச்சூழல் பாதுகாப்பு: </b>ஆற்றல் நுகர்வு மற்றும் கார்பன் வெளியேற்றத்தைக் கண்காணிப்பதன் மூலம், இயற்கைக்குப் பாதிப்பில்லாத 'பசுமைத் துறைமுகமாக' இது உருவெடுக்கும்.</p><p><br></p><p><b>ஸ்மார்ட் திட்டமிடல்:</b> சரக்குகளைக் கையாளுதல் மற்றும் கப்பல் போக்குவரத்து அட்டவணையைச் செயற்கை நுண்ணறிவு (AI) மூலம் மிகச் சிறப்பாக வடிவமைக்க முடியும்.</p><p><br></p><p><b>இது குறித்துத் துறைமுக ஆணையத்தின் தலைவர் சுசாந்த குமார் புரோஹித் கூறுகையில்:</b></p><p><br></p><p>"AI மற்றும் ஐஓடி தொழில்நுட்பங்களின் உதவியுடன் தூத்துக்குடி துறைமுகம் ஒரு 'ஸ்மார்ட் போர்ட்' ஆகப் பரிணமிக்கிறது. இது வெறும் வேகத்தை மட்டுமல்ல, பாதுகாப்பு மற்றும் நிலையான வளர்ச்சியையும் உறுதி செய்யும்." என்கிறார்.</p>